بالفيديو: فيلم العارف .. لما والدتك تعمل جيمس بوند في البيت!


كل سنه وانتو طيبين. ويارب عيد أضحى سعيد عليكم.. لو معاك عيدية كويسه وقررت تدخل السينما في العيد، فيلم العارف هايكون واحد من أبرز الاختيارات قدامك لو انت بتحب الأفلام العربي. تعالا اقولك شوية ملاحظات إيجابية وسلبية عن الفيلم بدون حرق أحداث.

فيلم العارف بيحكي عن عملية اختراق الكترونية بيتعرض لها أجهزة أمنية في دول عربية، بينتج عنها تسريب معلومات وأسماء عملاء وظباط بيتم اغتيالهم. نفس الاختراق ده بيحاولوا يعملوه مع جهاز أمني مصري، علشان كده بيستدعوا الهاكر الخبير يونس اللي هو أحمد عز. بمعرفة القائد بتاعه محمود حميده علشان يتصدى للأختراق ده ويعرف مين اللي وراه.

 

الجميل في فيلم العارف انه فيلم عيد بامتياز.. يعني عامل التوليفة بتاعة الأكشن والكوميدي مع شوية جاسوسية.. وجايب ضيوف شرف بحجم محمد ممدوح.. يعني لو عاوز تنبسط لمدة ساعة ونص أو ساعتين ومش عاوز تركز في فنيات وكده.. ده هايحصل.

 

نتكلم بقى في الفنيات.. الفيلم في سبيل أنه يطلع بالتوليفة الحلوة دي داس على كل ما له علاقة بالمنطق أو التسلسل الطبيعي للأحداث أو الحرفية في صناعة السينما.. يعني لو بنتكلم بعرف أفلام الجاسوسية، احنا مش عارفين أحمد عز بيشتغل ايه بالظبط في الجهاز.. ساعة نشوفه هاكر ماحدش قده في الدنيا. والمفروض شغلته كلها تبقى ورا الكمبيوتر. وساعة نلاقيه بيسافر دول العالم كلها تقريبا علشان يقبض على التنظيم اللي ورا عمليات الاختراق دي.. وساعة نلاقيه بيرجع مصر علشان يحمي البلد من تنفيذ المخطط.. هو لامؤاخذة يعني الجهاز الأمني مافيهوش الا الأستاذ أحمد عز ولا ايه؟! ده ناقص يجيبوه بيطفي النور وياخد الباب في ايده في نهاية يوم العمل في الجهاز!

 

بالنسبة للسيناريو والحوار في فيلم العارف .. مفهوم جدا أن الفيلم عاوز يقتبس عالم جيمس بوند. وده واضح من خلال التنقل بين الدول المختلفة، ده مش عيب. بس مش لدرجة انك تقتبس مشهد كامل بنفس حواره وحركة الممثلين فيه. واقصد هنا مشهد أحمد عز لما أحمد فهمي قبض عليه وكلامه معاه عن الفيران والقضاء عليها، وده مقتبس من فيلم جيمس بوند Skyfall في الحوار الشهير بين بوند وبين خافير بارديم.

 

مشهد تاني تم اقتباسه بنفس حركة الممثلين ونفس اخراج المعارك. وهي المعركة بين عز وبين رجالة التنظيم على السلم، وهو نفس مشهد الصراع بين تشارلز ثيرون ورجال المخابرات في فيلم Atomic Blonde

 

هل الفيلم قدم مشاهد أكشن كويسه؟ حصل.. لكن حتى دي حركة الكاميرا فيها كانت أسرع من اللازم، لكن الصرف والإنتاج كانوا واضحين من خلال التصوير في أكتر من دولة وفي اخراج مشاهد الاكشن اللي كان فيه عربيات وموتسيكلات وترابيزات بنج وبلياردو.

 

نتكلم بقى شوية عن الأداء التمثلي.. أحمد عز خلاص بقى تخصص مخابرات. لسه شايفينه في مسلسل هجمة مرتدة، وتقريبا بيقدم نفس الدور في العارف. لكن شتان بين مسلسل زي هجمه مرتدة مستوي على نار هاديه ومقتبس عن احداث حقيقية وواخد وقته في العرض ورسم خلفية وماضي قوي للشخصيات، وبين فيلم زي العارف عاوز ينط في قلب الأكشن مباشرة بأقل قدر ممكن من رسم شخصيات واضحة ومنطقية لأبطاله. ودي مش غلطة عز. اللي قدم أداء تمثيلي كويس.

 

مين بقى اللي كان المفروض يوازن التقل اللي عامله عز في الفيلم؟ الفيلن أحمد فهمي. والحقيقة ده مكانش حاصل خالص. حاجه في أداء فهمي كانت بتحسسني طول الوقت أنه جاي الفيلم مغصوب.. أو بيأدي شخصية الشرير وفي نفس الوقت اللامبالي باللي بيحصل. كأنه مدكن Come back مرعب بقى وده ماحصلش في السيناريو.. وزي مقولت ان عز ميتحملش أخطاء الفيلم، فهمي يتحمل أخطاؤه كممثل مبذلش المجهود الكافي للدور من وجهة نظري.

 

محمود حميده قدم أداء كويس معتاد منه، لكن السيناريو ماخدموش برضو. وظهر في كل مشاهده وهو بيدي تعليمات لعز. والتعليمات كلها منطقية ومفهومة يعني مش محتاجه انه يكون موجود علشان يقولها.. ومقدرتش أمنع نفسي  من مقارنته بدور قائد العملية في مسلسل هجمة مرتدة وهو هشام سليم. والحقيقة أن هشام يكسب بالضربة القاضية.

 

مصطفى خاطر بيقوم بدور مصطفى خاطر في الفيلم! وانا قاصد كلامي.. هو ده نفس مصطفى خاطر اللي بشوفه في أي عمل بيقوم بيه. والحقيقة ان ايفيهاته الكوميدية مكانتش مكتوبه كويس فكان دوره اللي المفروض يكون الخيط الكوميدي في الاحداث. كان فصيل جدا خاصة ان توظيف الكوميديا في الفيلم مكانش حلو أبدا.

 

أخر حاجه بقى.. فاكهة الفيلم.. واللي قدمت دورها حلو قوي.. الجميلة كارمن بصيبص. عملت أكشن حلو جدا ولمحة كوميدي جميلة. ده غير طبعا أنها جميلة جدا ولايقه في الدور جدا. ودي تاني مره تقريبا تشتغل جاسوسية بعد مسلسل الزيبق مع كريم عبد العزيز.

 

باختصار.. العارف فيلم هايعجبك لو مالكش في الهري الكتير. وعاوز تشوف فيلم أكشن لطيف منغير تشغيل دماغ كتير في موسم العيد. لكن لو كنت بتاع تفاصيل زي حالاتي. مش هايعجبك قوي.


محمد حمدي

محمد حمدي

محمد حمدي صانع محتوى مصري. يكتب في العديد من المؤسسات الصحفية والمواقع والمجلات الالكترونية. بالاضافة لعمله على إثراء المحتوى العربي على الأنترنت من خلال صناعة محتوى هادف وبناء.

اترك تعليقاً

لن يتم نشر عنوان بريدك الإلكتروني.