بالفيديو: ازاي تأمن حساباتك على السوشيال ميديا


كام مرة اتسرق حسابك على السوشيال ميديا وماعرفتش ترجعه مهما حاولت؟ كام مرة سمعت عن حد اتسربت بيانات أو صور له على المواقع ومش عارف يعمل ايه بعد ما بقى في ورطة لا يحسد عليها؟ تعالا أكلمك عن شوية حاجات تأمن بيها حساباتك على السوشيال ميديا بطرق ماحدش يقدر يخترقها.

النصيحة الأولى: اختيار كلمة السر

كل حاجه لها علاقة بتأمين بياناتك بتبدأ وتنتهي عند كلمة السر. والنصايح اللي الخبراء بيقولوها عادة هي أنك لازم تختار كلمة سر طويلة. ومكونة من حروف كبيرة وصغيرة وأرقام ورموز خاصة. بس تعالا نتكلم بصراحه يا صديقي العزيز.. الكلام ده ماحدش بيعمله. لأن كلمة السر في الحالة دي هاتكون طويلة وصعبة ومعقدة. ومش هاتقدر تفتكرها.

 

الحل في إنك تستخدم برنامج من برامج حفظ كلمات السر. البرامج دي مش بس بتخزن كلمات السر بتاعتك في مكان واحد أمين. لكنها كمان بتقترح عليك كلمات سر صعبة ومعقدة علشان تستخدمها في المواقع. وطبعا هي بتخزن كل حاجه عندها وبتعمل لها مزامنة مع باقي أجهزتك. بالتالي مافيش خوف من أنك تنسى حاجه مهما كانت معقدة. الأحلى كمان أنها بتنبهك لو كلمة من كلمات السر الخاصة بيك اتكررت مع عدد كبير من المستخدمين أو اتسربت أونلاين.

 

بقترح عليك في البرامج دي برنامج 1 password ولو مستخدم ماك. أقترح عليك الخاصية المدمجة في متصفح سافاري واللي بتعمل كل ده منغير ما تحتاج تنزل أي برامج أصلا. ونفس الكلام موجود على فايرفوكس وكروم.

 

النصيحة التانيه: المصادقة بعاملين على السوشيال ميديا

بتتقال بالانجليزي ٢ ستبس فريفيكاشن. والهدف منها أن حتى لو المخترق معاه كلمة السر بتاعتك. مايقدرش يدخل غير لما يدخل كود من أرقام بيتبعت لك في رسالة على موبايلك. أو يجيلك على ابليكيشن مخصص لكده على الموبايل.

الميزة دي هتلاقيها في كل المواقع اللي فيها كلمة سر تقريبا. السوشيال ميديا بلاتفورمز. ومواقع الايميلات كلها. غير طبعا مواقع البنوك والخدمات الحكومية وغيرها.

 

ناس كتير بتكسل تستخدم الطريقة دي علشان معقده شوية وبتتطلب تنزيل برامج على الموبايل او انهم يكونوا موجودين في مكان فيه شبكه علشان يستقبلوا الرسالة. وبيخافوا من ضياع حساباتهم لو مقدروش يوصلوا للموبايل اللي هاتوصل عليه الرسالة لاي سبب من الأسباب. لكن مع التقدم الكبير في التأمين. معظم المواقع بتقدم مجموعة اكواد ممكن المستخدم يطبعها ويحتفظ بيها علشان لو فقد موبايله لأي سبب يقدر يستخدم الأكواد دي.

 

النصيحة التالته: التأمين بمفتاح حقيقي.

النصيحة دي للناس اللي عاوزه تاخد تأمين بياناتها لحته تانيه خالص. الاختراع ده عباره عن فلاش ميموري بتتوصل بالكمبيوتر. وبمجرد توصيلها الكمبيوتر هايفهم ان صاحب الحسابات المتسجله على الفلاشة دي موجود وعاوز يدخل حساباته. بالتالي بيفتح قدامه كل الحسابات منغير ما يسأله على كلمة سر. وبمجرد ما يشيل الفلاش ميموري من الجهاز. ترجع كل حاجه تتشفر تاني.

 

عيب الجهاز ده انه مش مجاني. وبيكلف تقريبا حوالي ٣٠ دولار امريكي. وانه مش منتشر في المنطقة العربية كتير. وأخيرا انه لو ضاع او اتسرق منك ممكن تلاقي نفسك في خطر برضو.

 

باختصار.. تأمين حساباتك الالكترونية أصبح ضرورة. زيه زي تأمين بيتك ضد الحرامية. وأحيانا أهم كمان. اما بقى لو هاتقولي احنا كده كده متراقبين ومخترقين.. هقول لك دي تبقى قصة تانيه بقى يا عزيزي


محمد حمدي

محمد حمدي

محمد حمدي صانع محتوى مصري. يكتب في العديد من المؤسسات الصحفية والمواقع والمجلات الالكترونية. بالاضافة لعمله على إثراء المحتوى العربي على الأنترنت من خلال صناعة محتوى هادف وبناء.

اترك تعليقاً

لن يتم نشر عنوان بريدك الإلكتروني.