اختيار الباسوورد فن.. مش عّن عّن!


مش معقول نكون لسه في ٢٠٢٠ وألاقي كل يوم ناس بتكتب أن حساباتها على السوشيال ميديا أو الإيميلات بتاعتهم اتسرقت! وحد تاني عرف الباسوورد . بصراحه شديدة المواقع النهرده أصبحت بتؤمن مستخدميها كويس جدا. علشان كده نقدر نقول أن حوالي ٩٩٪ من حالات سرقة الحسابات أو الايميلات بيكون نتيجة اهمال المستخدم نفسه. مش غلطة في تأمين الموقع ومن هنا بتيجي أهمية اختيار الباسوورد

قواعد اختيار الباسوورد المثالية

  • الباسوورد المثالية لازم يكون فيها حرف واحد كبير Capital يعني. ويستحسن مايكونش أول حرف في الباسوورد لأن ٩٠٪ تقريبا من المستخدمين بيختاروا الحرف الأول يكون كابتل.
  • الباسوورد المثالية لازم تكون طويلة. ويستحسن تكون حوالي ١٠ حروف أو أكتر. وفي الغالب معظم المواقع بتقول لك الحد الأقصى من الحروف اللي يستحسن توصل لها كلها علشان تكون كلمة السر أقوى.
  • الباسوورد المثالية لازم يكون فيها أرقام. ولازم تبعد في اختيار الأرقام عن الأرقام التسلسلية زي ١ – ٢ – ٣ أو تاريخ ميلادك مثلا أو أي أرقام ينفع يتم تخمينها بسهولة.
  • مهم جدا تتجنب في كلمة السر أن يكون فيها كلمات سهلة التخمين. زي أسمك أو موديل عربيتك. اختار أسماء أو حروف عشوائية تماما وغير سهلة الحفظ وماينفعش أي حد يخمنها.
  • مهم جدا عدم مشاركة كلمة السر مع أي حد. وأي حد هنا تعني أي حد. سواء من الأهل أو الصحاب أو الجيران والمعارف. ولو فكرت شوية تلاقي أن كلمة (كلمة سر) ما جتش من فراغ يعني 🙂

إزاي تزود تأمين كلمة السر؟

هل اختيار كلمة سر قوية هي نهاية المطاف؟ لازم تحط في الاعتبار تأمين كلمة السر بطريقة تانيه أسمها OTP أو One time password وهي طريقة متعارف عليها حديثا بتزود من عدم احتمالية اختراق حساباتك حتى لو كلمة السر اتعرفت. والسر هنا يكمن في أن الموقع اللي بتدخل عليه بيبعت لك رقم عشوائي على موبايلك (أو من خلال أبليكيشن تأمين) علشان تدخله للموقع ومش هاتقدر تدخل الحساب إلا لو الرقم العشوائي وكلمة السر كانوا صح.

بس كده؟!

لا مش بس كده.. دلوقت معظم المتصفحات زي سافاري أو فايرفوكس وغيرها، بتقدم لك إمكانية اقتراح كلمات سر صعبة جدا، وتحفظها عندها على المتصفح، بحيث انت نفسك ماتكونش عارف كلمة السر، في الحالة دي هاتحفظ كلمة سر واحدة للمتصفح كله. وبكده هاتوفر على نفسك نسيان كلمات السر وضياعها وسهولة استنتاجها من أي حد عاوز يخترق حساباتك.

وأخر الكلام: لازم كل فترة – حوالي شهر – تغير كل كلمات السر لكل حساباتك. الموضوع متعب شوية ومُجهد شويتين. لكن هايغنيك عن أن أسرارك وحساباتك تبقى كلها مشاع قدام الناس أو قدام أي شخص عاوز يتسلى ويطلع على أسرار الناس.


محمد حمدي

محمد حمدي

محمد حمدي صانع محتوى مصري. يكتب في العديد من المؤسسات الصحفية والمواقع والمجلات الالكترونية. بالاضافة لعمله على إثراء المحتوى العربي على الأنترنت من خلال صناعة محتوى هادف وبناء.

اترك تعليقاً

لن يتم نشر عنوان بريدك الإلكتروني.